partekatu
• ATERPEAREKIKO HITZARMENA
Lasarte-Oriako Udalak lokal bat utzi dio ATERPEAri, tokiko merkataritzari ematen dion babesa indartzeko
Merkatarien elkarteak egoitza bat izango du KIUBeko bulego zaharretan, kanpainak koordinatzeko, sektorea trebatzeko eta ekintzaile berriei laguntzeko.
Pasa den astelehenean, uztailaren 21ean, Lasarte-Orian Udalak ATERPEA Merkatari, Ostalari eta Zerbitzuen Elkarteari utzitako lokal berriaren giltzak emateko ekitaldi sinbolikoa egin zen. KIUBeko bulego zaharretan dago gunea, Zahar Etxearen atzealdean (Ganbo kalean), eta egoitza egonkor bat izango du elkarteak bere jarduera bultzatzeko.
Agustin Valdivia alkateak eman zizkion giltzak Mabel Pedreira ATERPEAko presidenteari, erabilera doan lagatzeko hitzarmena formalizatzeko hilabeteetako elkarlanaren amaiera sinbolizatzen duen ekitaldi batean.
Bere mintzaldian, alkateak azpimarratu zuenez, “lokala ematearekin batera, aspalditik lantzen ari garen prozesu bat amaitzen da. Lehenik auzo elkarteei espazioa ematea lehenetsi zen, eta orain ATERPEAren txanda zen, gure hauteskunde programan eta udal aurrekontuetan jasotzen zen bezala”. Gainera, iragarri zuen lagatako lokala, behin-behinean erabiltzekoa, lehen Euskaltegiak eta KIUBek zuten eraikina osorik berritzeko proiektuaren barruan birgaituko dutela, “baina premiazkoa zen elkartearen beharrei erantzutea, eta, beraz, hemendik lanean has daitezen ahalbidetu nahi izan dugu”.
Hitzarmenaren esparruan, elkarteak merkataritza dinamizatzeko kanpainetan laguntzeko konpromisoa hartu du, esaterako, merkataritzako bonoetan, lokal berria herritarrentzako arreta- eta informazio-gune gisa erabiltzea erraztuz, eta, hala, beste udal-bulego batzuetan kolapsoak saihestuz, hala nola Gizarte Zerbitzuetan. Horrez gain, merkataritza eta ostalaritzari buruzko formazioak emango ditu, eta Udaleko Sozioekonomia arloko ekintzaile berriak hartuko ditu, tokiko merkataritza-sareari buruz orientatzeko.
ATERPEAko lehendakari Mabel Pedreirak, bere aldetik, eskerrak eman nahi izan zizkion Udalari, bereziki Agustin Valdivia alkateari eta Nuria Fernandez Sozioekonomia zinegotziari, “bere konpromiso eta laguntzagatik. Lokal hau ez da espazio fisiko bat soilik, urteetako lanaren eta ahalegin partekatuaren emaitza da. Elkargune eta funtsezko tresna da tokiko merkataritzari laguntzen jarraitzeko eta udalerriko bizitza ekonomikoa dinamizatzeko”.
Lokala uzteak indartu egiten du udalak merkataritza hurbila, bizia eta iraunkorra sustatzen jarraitzeko egiten duen apustua, sektoreko profesionalekin lankidetzan.
Argazkia eta informazioa: Lasarte-Oriako Udala
