partekatu
• TXARANGA EGUNA
Lasarte-Oriak lehen “Txaranga Eguna” ospatuko du maiatzaren 17an
Bost txaranga, musika egun osoan eta omenaldia Oiantxe in Deuri egun berri batean.
Lasarte-Oriako Udalak, Jaiak sailaren bitartez, txarangei eskainitako jardunaldi bat antolatu du lehen aldiz, jai herrikoietan hain presente eta maitatuak diren musika formazio horiei balioa emateko asmoz. Maiatzaren 17an, larunbata, izango da hitzordua, Txaranga Eguna izenarekin, eta bost txarangak hartuko dute parte, txistulari talde batez gain.
“Ikusgarritasun handiagoa eman nahi diegu txarangei, eta herriak merezi duten bezala gozatu ahal izatea. Gure jaien funtsezko parte dira eta jardunaldi hau haien lanari omenaldia da”, adierazi du Jesús Alonso Jaietako zinegotziak ekitaldia aurkezteko prentsaurrekoan.
Bestalde, zinegotziak nabarmendu duenez, “Txaranga Eguna musika ospakizun bat izateaz gain, herri-kulturaren, herritarren parte-hartzearen eta gure herriko elkarteen dinamismoaren aitortza ere bada. Horrelako ekimenek ehun soziala indartu eta herria egiten dute”.
Ekitaldiaren antolakuntzan herriko Oiantxe in Deu txarangak parte hartu du aktiboki, eta, gainera, 10. urteurrena ospatuko du aurten. Programazioak bere ibilbideari eskainitako ekitaldi berezi bat izango du, eta horrez gain, Arranopola Gazte Txaranga taldeari lotutako txaranga gazte berriaren estreinaldia ere izango da.
Lehen edizio honen aurrekontua ia 8.000 eurokoa da, eta publiko guztientzako programazio anitza du:
- 10:30 Diana herriko kaleetan zehar txistularien eskutik.
- 11:00 Musika tresnak sortzeko haurrentzako tailerra.
- 12:00 Oiantxe in Deu taldeko kideei elkarrizketa publikoa Okendo plazan.
- 12:30 Joselontxos txarangaren ibilbide musikalaren hasiera herriko hainbat kale eta tabernetan.
- 14:30 Herri bazkaria.
- 16:00 Erraldoiak eta buruhandiak, Oiantxe in Deu eta neska-mutilak goizean sortutako tresnekin lagunduta.
- 18:00 Arranopola Gazte Txarangaren aurkezpen ofiziala.
- 20:00 Herrian zehar ibilbide musikala Mutil Gazteen eskutik.
- 22:00 Egunaren amaiera txaranga batekin, gauerdira arte kaleak alaituz.
Txaranga Eguna jarraitzeko bokazioarekin eta txarangen jai, gizarte eta kultura balioaren aitortza gisa jaio da. Udaletik herritar guztiak gonbidatzen ditugu parte hartzera eta musikaz, alaitasunez eta tradizioz beteriko egun batez gozatzera.
Argazkia eta informazioa: Lasarte-Oriako Udala
